Ձեր նշած փորձառու դիվանագետները հավանաբար այն դասալիքներն էին, որ լքեցին իրենց պաշտոնները, իրենց բաժին հասած խրամատները այն օրերին, երբ Հայաստանի Հանրապետության սուվերեն տարածքի վրա տեղի էր ունենում կամ ունեցել ռազմական ագրեսիա: Այս մասին ԵԱՀԿ գործող նախագահ, Մալթայի Հանրապետության արտաքին ու եվրոպական հարցերի և առևտրի նախարար Իեն Բորջի հետ համատեղ ասուլիսի ժամանակ հայտարարել է ՀՀ ԱԳ նախարար Արարատ Միրզոյանը՝ անդրադառնալով այդ դիվանագետների պնդմանը, թե Ալմա-Աթայի հռչակագրի հիման վրա դելեմիտացիա իրականացնելը հակասահմանադրական է:
«Որևէ կաթիլ լրջություն այս փաստի հիշատակումից հետո այդ մարդկանց և իրենց դիրքորոշումների նկատմամբ չեմ կարող ունենալ և սա ամենամեղմ գնահատականն է, որ կարող եմ թույլ տալ հնչեցնել, բայց իրականությունը ավելի վատ է: Ականահարելով Ալմա-Աթայի հռչակագիրը և դրա հիման վրա խաղաղության գործընթացը՝ այդ մարդիկ շարունակում են ականահարել ՀՀ ինքնիշխանություը, պետականությունը, տարածքային ամբողջականությունը, լավագույն մեկնաբանությամբ՝ չգիտակցելով, վատագույն մեկնաբանությամբ՝ այլ երկրի ուղղակի թելադրանքով»,- ասաց նա:
