Հայաստանի Հանրապետության արտաքին գործերի նախարար Արարատ Միրզոյանը վերահաստատել է, որ Երևանի ու Անկարայի միջև գոյություն ունի առողջ երկխոսություն, և Հայաստանը պատրաստ է ամբողջությամբ կարգավորել հարաբերությունները Թուրքիայի հետ։
«Արմենպրես»-ի հաղորդմամբ՝ այս մասին Միրզոյանը հայտարարել է Վրաստանի ԱԳ նախարար Իլյա Դարչիաշվիլիի հետ համատեղ մամուլի ասուլիսի ընթացքում։
«Ինչպես և նախկինում, Հայաստանը շահագրգռված է և գործնական ջանքեր է գործադրում հարևանների հետ հարաբերությունները կարգավորելու համար։ Մենք լիովին պատրաստ ենք ամբողջականորեն կարգավորել հարաբերությունները Թուրքիայի հետ։ Պատրաստ ենք այս համատեքստում իրականացնել արդեն իսկ ձեռք բերված պայմանավորվածությունները»,- ասել է Միրզոյանը՝ հավելելով, որ Հայաստանը Թուրքիայի հետ առողջ երկխոսություն ունի։
ՀՀ ԱԳ նախարարի կարծիքով՝ վաղուց եկել է արդեն իսկ ձեռք բերված պայմանավորվածությունները (խմբ՝ երրորդ երկրների քաղաքացիների և դիվանագիտական անձնագիր ունեցողների համար սահմանի բացում, դիվանագիտական հարաբերությունների հաստատում) կյանքի կոչելու ժամանակը։