Հայաստանը ՀԱՊԿ-ը լքելու մտադրություն չունի, բայց Հայաստանը, լինելով ՀԱՊԿ-ի անդամ, ունի որոշակի պարտավորություններ ՀԱՊԿ մյուս անդամ երկրների նկատմամբ և ՀԱՊԿ մյուս անդամ երկրները Հայաստանի նկատմամբ, այդպիսինն է այդ անվտանգային համակարգի էությունը; Այս մասին խորհրդարանական ճեպազրույցների ժամանակ ասաց ՀՀ ԱԺ ՔՊ խմբակցության պատգամավոր Գևորգ Պապոյանը:
Ըստ Պապոյանի՝ ՀՀ-ն երբեք ՀԱՊԿ-ին չի մերժել, որպեսզի ՀԱՊԿ-ն առաքելություն ուղարկի Հայաստան.
«ՀՀ-ն հստակ հարցադրում է անում՝ որտե՞ղ է գալու այդ կոնտինգենտն իր առաքելությունն իրականացնելու, որովհետև, երբ օրինակ՝ եվրոպացիները գալիս են՝ իրենք ասում են, որ մենք ունենք այսպիսի քարտեզ, որտեղ այ այս բլուրը Հայաստանինն է, այս անտառափեշն Ադրբեջանինը, և մենք գալու ենք ու այս բլուրի մոտ կանգնենք և դիտարկենք, երբ մենք մեր ՀԱՊԿ գորընկերներին ենք հարցնում, ասում ենք՝ որտեղ եք գալու կանգնեք, իրենք չեն ասում, որ օրինակ՝ այս բլուրը Հայաստանինն է, անտառափեշը՝ Ադրբեջանինը, բայց, եթե իրենք գալիս են ու ինչ-որ մի տեղ կանգնում են, պետք է ֆիքսեն՝ որտեղ է սկսվում Հայաստանը և որտեղ է սկսվում Ադրբեջանը, որովհետև, եթե իրենք չեն ֆիքսում, ապա ի՞նչն են դիտարկելու: Ադրբեջանը օրինակ՝ 10 քայլ առաջ եկավ, դա Ադրբեջանի տարածքում արե՞ց, թե՝ ՀՀ-ի, այսինքն՝ շատ կարևոր է ելակետերը ֆիքսել, սա է ամբողջ խնդիրը և Հայաստանը ՀԱՊԿ-ից ընդամենը պահանջում է այնպիսի դիրքորոշում, որն ուղղակի ՀՀ-ի ազգային և պետական շահերի հետ համընկնում է և ընդհանրապես՝ սա Ալմա-Աթայի հռչակագրով է ամրագրված, Հայաստանն ու Ադրբեջանը ՄԱԿ-ի անդամ են դարձել այդ նույն տրամաբանությամբ, սա ֆիքսո՞ւմ են մեր ՀԱՊԿ գործընկերները, թե չեն ֆիքսում՝ սա շատ կարևոր է: Մեր պահանջը հետևյալն է՝ մենք պետք է մեր գործընկերներից հստակ դիրքորոշում ունենանք մեր տարածքային ամբողջականության վերաբերյալ, մեր սահմանների վերաբերյալ: Հիմա, երբ մենք այդ հարցերի շուրջ չենք ստանում պատասխաններ և չի էլ ակնկալվում, որ կստանանք պատասխաններ, այդտեղ ուղղակի գործընթացին մասնակցելու նպատակահարմարությունը չեմ հասկանում: Մենք չէինք ուզի, որ այդպես լիներ, բայց այդպես է, այդտեղից է գալիս այն տրամաբանությունը, որ ՀԱՊԿ-ն է դուրս գալիս ՀՀ-ից, մենք չենք ուզում դուրս գալ, բայց դե ֆակտո իրենք դուրս են դրել մեզ այդ գործընթացից»:
