Առողջապահության նախարար Անահիտ Ավանեսյանը Շվեյցարիայի Մոնտրո քաղաքում մասնակցել է Պատվաստանյութերի և իմունիզացիայի գլոբալ դաշինքի (GAVI) խորհրդի հերթական նիստին, որի ընթացքում քննարկվել են իմունականխարգելման ծրագրերի հետագա իրականացման կարևորագույն խնդիրներ, ընդունվել են միասնական որոշումներ:
Նիստի ընթացքում մասնակից բոլոր երկրներից կազմվել է «Իրականացնող երկրների խումբ»: Այն կօգնի երկրներին ապագայում հանդես գալ ավելի ուժեղ ձայնով, ինչպես նաև ընդունել կարևոր որոշումներ, որոնք կազդեն բնակչության առողջության և բարեկեցության վրա:
Ընդունվել են նաև որոշումներ՝ բարելավելու ծրագրերի կառավարումը և ամրապնդելու երկրների, գործընկերների և դաշինքի կապերը` ռազմավարության արդյունավետ իրականացման ուղղությամբ։
Քննարկվել են COVAX հարթակի գործունեությանը և առկա խնդիրներին վերաբերող մի շարք հարցեր, որոնք խիստ կարևոր են Հայաստանի Հանրապետության հակահամաճարակային միջոցառումները պատշաճ իրականացնելու համար:
