Մետրոյի Աջափնյակ կայարանի կառուցման գործնական աշխատանքների հաջորդ քայլն է արվում, կառավարության նիստում հայտարարեց վարչապետ Նիկոլ Փաշինյանը։
Նրա խոսքով հայտարարվել էր կայարանի նախագծման մրցույթ, և մրցույթի արդյունքներով կա հաղթող։
«Այսօր մենք քննարկում ենք արդեն ֆինանսավորելու հարցը, որպեսզի նախագծողն արդեն մետրոյի Աջափնյակ կայարանի նախագիծը պատրաստի, ինչը նշանակում է, որ մենք արդեն մտնում ենք շինարարության փուլ։ Իհարկե, կառավարությունը պետք է ֆինանսավորի այդ նախագիծը, բայց մենք վերջերս տեսանք քրեական մի գործի շրջանակներում Երևան քաղաքին հասցված շուրջ 850 մլն դրամ վնասի փոխհատուցում է տեղի ունեցել։ Եվ քննարկումների արդյունքում որոշվեց, որ այդ գումարն առաջին փուլով, 750 մլն դրամը դրանից ուղղվի այդ նպատակին։ Եվ քրեական գործը վերաբերում էր Փարկինգ սիթի սերվիս ընկերության գործունեության հետ կապված մի դրվագի»,- ասաց Փաշինյանը։
Երևանի քաղաքապետ Հրաչյա Սարգսյանն ասաց, որ շուրջ 50 մլն դոլար կարող է արժենալ շինարարությունը՝ հաշվի առնելով տարբեր նախադեպեր։
«Նախագիծը կարծում եմ կառավարության հետ համատեղ կիրականացնենք, իսկ շինարարության աշխատանքները քննարկման ենթակա են»,- լրագրողների հետ ճեպազրույցի ժամանակ ասաց քաղաքապետը՝ նշելով, որ մինչև նախագծումը չավարտվի, չեն կարող ասել, թե ինչ ծավալի ներդրումներ են պետք կայարանի կառուցման համար։
Ըստ Հրաչյա Սարգսյանի նախագծման աշխատանքները տևելու են ավելի քան մեկ տարի․
Հրաչյա Սարգսյանը նշեց, որ Աջափնյակի կայարանի կառուցմանը զուգահեռ մետրոպոլիտենի մյուս կայարանների վերազինման ծրագիր կիրականացվի։ Անդրադառնալով հարցին, որ այս կայարանի կառուցումը խոստման մակարդակում է մնում, քաղաքապետն ասաց, որ այս պահի դրությամբ խոստման մակարդակից մի քանի քայլ ավելի է, քանի որ մեկնարկում են նախագծման աշխատանքները․ «Այս պահին խոստման մակարդակից մի քանի քայլ ավելի է, մնացածն ընթացքում կերևա»։