Ոչ ոք շահագրգռված չէ Լեռնային Ղարաբաղում ճգնաժամի զարգացմամբ՝ ոչ Հայաստանը, ոչ Ադրբեջանը։ Այս մասին «ՌԻԱ Նովոստի» գործակալության փոխանցմամբ ասել է Ռուսաստանի նախագահ Վլադիմիր Պուտինը։
«Ռուսաստանը որոշակի դեր է խաղացել այս շատ լուրջ ճգնաժամի կարգավորման գործում: Ոչ ոք շահագրգռված չէ, որ այն զարգանա՝ ոչ Ադրբեջանը, ոչ Հայաստանը, առավել եւս` Լեռնային Ղարաբաղի բնակիչները: Քանի որ հարցի մյուս կողմն այն է, որ եթե ապրենք խաղաղ և բարեկամաբար, այդ դեպքում մենք պայմաններ կստեղծենք մարդկանց կյանքի բարելավման համար ոչ միայն անվտանգության ոլորտում, ես նկատի ունեմ տնտեսական զարգացումը, սոցիալական զարգացումը, ինչը, իհարկե, Ղարաբաղում մարդկանց ամենաշատն է պետք», – ասել է Պուտինը:
Պուտինը նշել է, որ Լեռնային Ղարաբաղի շուրջ կուտակվել են բազմաթիվ խնդիրներ՝ կապված ենթակառուցվածքների վերականգնման ու Հայաստանի ու Ադրբեջանի սահմանների սահմանազատման հետ:
«Մենք ամեն ինչ անելու ենք տարածաշրջանում նորմալ հարաբերությունները վերականգնելու համար», – նշել է է Պուտինը: