Մարտի 21-ին Հայաստանի Հանրապետության արդարադատության նախարարության «Արմավիր» քրեակատարողական հիմնարկի գրադարանում ազատազրկված անձանց համար կազմակերպվել էր մշակութային միջոցառում՝ հանդիպում-քննարկում ձևաչափով։ Միջոցառումը կազմակերպվել էր դատապարտյալների շրջանում գործող ինքնագործ մշակութային միավորման անդամ, ցմահ դատապարտյալ Արթուր Քոչարյանի նախաձեռնությամբ, նրան ընդառաջել և աջակցել է սոցիալական, հոգեբանական և իրավական աշխատանքների բաժինը։
Հանդիպման հյուրերն են եղել դերասան, հաղորդավար Սերգեյ Դանիելյանը և լրագրող Արման Սուլեյմանյանը։
Սերգեյ Դանիելյանը ներկայացրել է հումորային ժանրի առանձնահատկությունները, պատմել ֆիլմերի նկարահանման ընթացքի, բեմում և տեսախցիկների առջև դերասանի պահվածքի, կերպարային բնավորության և խառնվածքի մասին՝ համեմելով խոսքը հումորային դրվագների պատմություններով։ Դերասանն անդրադարձել է նաև հասարակության և ժամանակի պահանջով ներկայացումների և ֆիլմերի ժանրային, բովանդակային փոփոխություններին։
Միջոցառումն անցել է բավական ակտիվ, ուրախ երկխոսության մթնոլորտում։ Ներկա է եղել շուրջ 20 դատապարտյալ։ Ավարտին ազատազրկված անձինք հայտնել են իրենց շնորհակալությունը հյուրերին և կազմակերպիչներին՝ իրենց մեկ օրը անազատության մեջ բովանդակալից, տրամադրող և հիշարժան դարձնելու համար՝ հույս հայտնելով նաև, որ այդպիսի հետաքրքիր հանդիպումներ կկազմակերպվեն պարբերաբար։
