ԱԺ-ն քննարկում է «Ազգային անվտանգության մարմիններում ծառայության մասին» օրենքում փոփոխությունների նախագիծը, որով առաջարկվում է ԱԱԾ-ում ատեստավորման նոր համակարգ ներդնել։
ԱԱԾ տնօրենի տեղակալ Անդրանիկ Սիմոնյանի խոսքով, ատեստավորման նոր համակարգի ներդրման արդյունքում նախատեսվում է բարձրացնել վարձատրությունը, ինչպես նաև ապահովել ծառայողների մասնագիտական պատշաճ մակարդակը։ «Առաջարկվում է ԱԱԾ մարմիններում պետական սահմանի պահպանության, հետախուզական, հակահետախուզական, օպերատիվ-հետախուզական գործունեության իրականացման, հատուկ առաջադրանքների կատարման, պլանավորման և վերահսկման գործառույթներ իրականացնող ծառայողների համար ատեստավորման արդյունքում հաշվարկել հավելավճար: Նշված պաշտոնները զբաղեցնող ծառայողներն ատեստավորմանն առաջին անգամ կմասնակցեն կամավորության սկզբունքով: Յուրաքանչյուր հաջորդ ատեստավորումը կիրականացվի երեք տարին մեկ անգամ»,- տեղեկացրեց ԱԱԾ տնօրենի տեղակալը։
Ըստ նրա՝ ատեստավորման բացասական արդյունքի դեպքում ծառայողը կրկին ատեստավորում անցնելու համար մեկ տարվա ընթացքում կունենա երկու անգամ դիմելու հնարավորություն։
